Երախտավորի հիշատակին

Կյանքից հեռացավ առողջապահության բնագավառի ճանաչված գործիչ, բժշկական գիտությունների թեկնածու Էմմա Կոնստանտինի Այնաջյանը:

Ծնվել է 1930թ., Թբիլիսիում: 1947թ., ավարտելով միջնակարգ դպրոցը, տեղափոխվել է Երևան և ընդունվել Երևանի պետական բժշկական ինստիտուտի բուժական ֆակուլտետը, որն ավարտել է 1954թ.: 1954-55թթ. ամուսնու` նույն ինստիտուտի անատոմիայի ամբիոնի դոցենտ Հ. Այնաջյանի հետ գործուղվել է աշխատանքի` Տաջիկական ԽՍՀ: Վերադառնալով Հայաստան, 1956-1961թթ. աշխատել է Թալինի շրջանային հիվանդանոցում որպես մանկաբույժ: 1961-2008թթ. Երևանի թիվ 1 կլինիկական ծննդատան` այժմ .Նարեկացու անվան ԲԿ, նորածինների բաժանմունքի վարիչն էր, 2008թ.-ից` տնօրենի խորհրդականը` մանկաբուժության գծով: 1987-2003թթ. աշխատել է ՀՀ ԱՆ մոր և մանկան առողջության պահպանման վարչությանում որպես գլխավոր մասնագետ: 

Բազմաթիվ գիտական հոդվածների հեղինակ է: Մեծ ներդրում է ունեցել ռեզուս-կոնֆլիկտի պատճառով ՀՀ-ում նորածինների մահացությունը զգալիորեն նվազեցնելու գործում: Ներդրել է նշված հիվանդության ժամանակ արյան փոխանակային փոխներարկման, ինչպես նաև հղիների մոտ հակառեզուսային գամմա-գլոբուլինի մեթոդները, որոնց շնորհիվ այժմ մեր հանրապետությունում նվազագույնի է հասել այդ կոնֆլիկտի պատճառով մանկական մահացությունը: 

Երկար տարիներ աշխատել է Երևանի բժիշկների կատարելագործման ազգային ինստիտուտում որպես նեոնատոլոգիայի ամբիոնի վարիչ, զգալի ներդրում ունի նշված բնագավառում կադրերի պատրաստման գործում:

Նա միշտ վայելել է աշխատանքային ընկերների սերն ու համակրանքը: 

Էմմա Այնաջյանի հիշատակը վառ կմնա նրան ճանաչողների, մտերիների և բուժաշխատողների սրտերում:

Հարցեր, պատասխաններ, մեկնաբանություններ